ЎЗ УЙИНИ ФОҲИШАХОНА ҚИЛГАН АЁЛ

Судланувчи Эргашева Замира (исми-шарифи ўзгартирилган) 2024 йил 10 сентябрь куни соат 20:00 да тадбирга жалб қилинган "Жаска" ва "Малика" исмли шахслардан олган 300.000 сўм пул эвазига уларни жинсий алоқа қилишлари учун ўз уйида алоҳида хона ажратиб, шароит яратиб бериб,  фохишахона ташкил этган.

Судда судланувчи Эргашева Замира  айбига тўлиқ иқрорлик билдириб, қуйидагича кўрсатма берди. 2024 йил 10 сентябрь куни  у яшаш уйида ўз ишларини қилиб юрганида кимдир унинг дарвозасини тақиллатади. Бориб қараганида, илгаридан ўзига нотаниш бир бола унга "Лочин" исмли йигитдан уни манзилини олганлигини, унаштирилган қизи билан келганлигини ва у билан бир кеча туриб, эрталаб чиқиб кетишини айтади. Унга уйида турганлиги учун пул беришини айтиб дастлаб 150.000 сўм, таниш қизи билан бирга келгандан сўнг яна 150.000 сўм пулларни беришини айтади. Замира айрим пайтларда уйидан меҳмонхона сифатида фойдаланганлиги сабабли йигитнинг таклифига рози бўлади. Ўша боладан пул олганидан сўнг танишлари билан "гаштаги" борлиги сабабли уйидан чиқиб кетади. "Гаштак"да танишлари билан ўтирган вақтида 150.000 сўм бериб кетган бола телефон қилиб, яшаш уйини олдида турганлигини айтади. У уйига келиб йигит билан қизга меҳмонхонани кўрсатиб, уларга зарур бўлган барча шароитни яратиб беради. Жаска ва унинг таниш қизи меҳмонхонага кириб кетгандан бироз вақт ўтиб, Оқдарё туман ИИБ ходимлари унинг яшаш уйига етиб келишади. Унга тезкор тадбир ўтказилаётганлиги, унга Жаска томонидан берилган пулларни беришини сўраганлиги, ИИБ ходимларига Жаска берган жами 300.000 сўм пуллардан 250.000 сўм пулларни берганлиги, 50.000 сўм пулларни гаштакка борган вақтида ишлатиб юборганлигини айтади. ИИБ ходимлари  холислар билан бирга унинг уйини кўздан кечириб, бу ҳақида баённома расмийлаштириб, уларга берган 250.000 сўм пулларини далилий ашё сифатида расмийлаштиради. Бугунги кунда Замира Эргашева қилмишидан пушаймон эканлиги, ногирон ва кекса ёшдаги отаси ҳамда фарзандининг ягона боқувчиси эканлиги, унга нисбатан қонуний енгиллик беришни айтиб кўрсатма берди.

Судланувчи Эргашева Замирага Ўзбекистон Республикаси ЖК 131-моддасининг 2-қисми билан ЖК 57-моддасини қўллаб, ҳар ойда ойлик иш ҳақидан 10 фоизини давлат даромади ҳисобига ушлаб қолган ҳолда 1 йил муддатга ахлоқ тузатиш ишлари жазоси тайинланди. 

Жавоҳир ТЎРАЕВ,

туман прокурорининг катта 

ёрдамчиси, 1-даражали юрист.