Қайси шифокорга ишонайлик

3 яшар набирамнинг томоғи оғриб, уч ойдирки, тинимсиз йўталади. Тумандаги кўпгина болалар шифокорларига учрашдик. Ҳаммаси бир гапни айтади:
- Болангизнинг йўтали аллергичний, 3 ойгача парҳез қилмасангиз, ҳар қанча даволанмасин, тузалиб кетиши қийин. Ҳозирча, ушбу дори-дармонларни ичкизиб турасиз. Лекин, мен ёзган дориларни албатта фалон дорихонадан олинг, уларники ишончли, дейишади.
Боламизнинг соғлигини ўйлаб, врач айтган дорихонадан дори-дармонларни сотиб олар эканмиз, дориларнинг нархи жуда қимматлигидан ҳайрон қоласан киши. Бунинг сабабини сўрасангиз: "Бизнинг дориларимиз четники, шунинг учун нархи бироз қиммат", дейишади. Ахир, илгари болаларимизнинг томоғи оғриганида оддийгина "мукалтин", "пенциллин" сингари дорилар билан даволар эдик. Нархи ҳам жуда арзон эди. Дорихона ҳам туман бўйича 1-2 та бўлар эди. Ҳозирги кунда ҳар қадамда дорихона, лекин, уларнинг ҳар бирида нарх-наво ҳам, дорининг сифати ҳам ҳар хил. Шифокорлар арзимаган касалга ҳам бир дунё дори ёзиб беради. Одамларнинг табиий иммунитети қолмаяпти. Худди дорихоналар билан шифокорлар келишиб олганга ўхшайди.
Йўлда бир танишимни учратиб, дардимни айтган эдим, менга шундай маслаҳат берди: "Ҳозирги пайтда Умиров ва унинг хотини энг яхши болалар врачи ҳисобланади. Болани зудлик билан ўша врачларга олиб боринг, тезда соғайиб кетади", деди.
Эрталабдан Умировнинг ҳузурига шошилдик. Рўйхатга эллик бешинчи бўлиб ёзилдик. Врач ҳузурига келаётган одамларнинг эса ҳамон охири кўринмайди. Рўйхатнинг охири саксонтадан ошиб кетди. Бир кунда шунча одамни кўришга улгурармикан, деган ҳадик билан навбатимиз келишини кутиб ўтирдик. Турли хил касалликлар билан оғриган болалар, уларнинг ота-онаси еру кўкка сиғмайди гўё. Кимдир тик оёқда турибди, кимдир зинада ўтирибди. Бемор болаларнинг йиғиси, навбат кутиб турган ота-оналарнинг бетоқатлигидан соғ одам ҳам касал бўлади. Нима бўлганда ҳам, бу ерга ташриф этган ҳар бир кишининг мақсади битта, қийинчилик билан бўлсада, тезроқ врач қабулига кирса-ю, фарзандининг дардига даво топса, бўлгани.
Болалар бўлимининг тозалик бекаси ҳам асабий ҳолатда дамба-дам атроф-муҳитни тозалар, ҳар қанча уринмасин, тартибсиз равишда навбат кутиб турган одамларни ташқарига чиқара олмай хуноб бўлар эди:
- Одамларга ҳам ҳайронман. Бошқа врач йўқдек туманда, ҳамма шу ерга чопиб келади. Ахир, бу нуқул фирмаларни дориларини ёзиб, мўмай даромад қиляпти-ку. Устига-устак эр-хотин одамларни пулини йиғиб, ўша фирма ҳисобидан йилда 1-2 марта дам олишга ҳам бориб келади.
Тозалик бекаси ўзига-ўзи гапирар, унинг сўзлари ҳеч кимнинг қулоғига кирмас эди. Бу ерга ташриф этганларнинг бирдан бир мақсади битта. У ҳам бўлса, тезроқ навбати келиб, врач ҳузурига кириш ва боласининг дардига даво топишдан иборат. Ахир, фарзанди касал бўлган онанинг кўзига бу ёруғ олам қоронғу кўринади. Боласининг соғлигини тиклаш учун борини аямайди. 
Шундай экан, келажагимиз ворислари бўлган болаларимиз соғлигини муҳофаза қилиш, улар ўртасида учраб турадиган турли хил касалликларни бартараф этишда зарур шарт-шароитларни яратиш, бу борада етук кадрларни жалб қилиш бугунги куннинг долзарб вазифаларидан бири эканлигини асло унутмаслигимиз керак.