ИНТЕРНЕТДАГИ ФИРИБГАРЛИК ФОШ ЭТИЛДИ

Судланувчи Саидкамолов Носирбек(исми-шарифи ўзгартирилган), эндигина 21 ёшни қарши олмоқда. Андижон институти талабаси, оилали бўлишига қарамасдан, у нега жиноят кўчасига кириб қолди? Илгари ҳам судланганлиги, унга нисбатан 2 марта жарима жазоси қўлланилганлиги Носирбекка сабоқ бўлмади. 
У такроран, алдаш ва ишончни суиистеъмол қилиш йўли билан ўзганинг мулкини қўлга киритишни ўз олдига мақсад қилиб олди. Шу мақсадда ўзининг "Telegram" иловасидаги "apple.variant_uz" деб номланган шахсий каналига ва "Instagram" иловасидаги "apple.variant_uz" деб номланган шахсий профилига Apple компаниясида ишлаб чиқарилган iPhone русумли телефонларнинг фото суратларини жойлаштиради. Аслида ушбу  телефонлар ўзида йўқ бўлсада, гўёки ўзида ушбу телефонларни бордек қилиб кўрсатиб, буюртма берган мижозларга телефонларини икки кунлик муддатда почта хизмати орқали етказиб беришини айтиб, икки кунлик муддатда телефонларини почта хизмати орқали етказиб бермасдан буюртма берилган телефонларининг пулларини фирибгарлик йўли билан қўлга киритади.
Жумладан, Абдиев Олимжон 2024 йил 9 декабрь куни ўзининг "Telegram" иловасига очилган "Olimjon" номли профили орқали каналга жойлаштирилган "iPhone 13 Pro" русумли телефон аппаратини сотиб олмоқчилигини айтиб, телефоннинг дастлабки 50 фоиз тўловини, яъни 2.313.000 сўмни 9860 1601 4132 1762 рақамли пластик картасига ўтказиб беради. Лекин, минг афсуслар бўлсинким,  Н.Саидкамолов буюртма берилган телефонни икки кунлик муддатда почта хизмати орқали етказиб бермасдан пулларни ўзининг эҳтиёжларига ишлатиб юборган.
Суд мажлисида сўроқ қилинган судланувчи Саидкамолов Носирбек ўзининг кўрсатмасида айбига иқрорлик билдириб, қуйидагича баёнот берди.  
У 2023 йилнинг бошларида осон пул топиш мақсадида, "Телеграм" мессенжеридаги канал орқали "Инстаграм" ижтимоий тармоғидаги профилни сотиб олади. "Телеграм" мессенжерида +1 812 906 0050 абонент рақамига очилган профилни 10.000 сўм эвазига сотиб олиб, кейинчалик ушбу канални 700.000 сўм эвазига сотиб олганлиги, "Инстаграм" ижтимоий тармоғидаги профилни "apple.variant_uz" деб, "Телеграм" мессенжеридаги профилнинг фойдаланувчи номини @apple_adminka деб,           шу мессенжердаги канални "apple_variant_uz" (https://t.me/apple_variant_uzb) деб номлаганлиги, шундан сўнг ушбу "Телеграм" каналга ва "Инстаграмм" профилга Apple компаниясининг iPhone русумли телефонларни арзон гаровга муддатли тўлов эвазига сотишини айтиб, эълонлар жойлаштира бошлайди. Шундан сўнг жойлаштирган эълонлар бўйича мижозлар алоқага чиққанида, уларга ҳақиқатдан ҳам iPhone русумли телефонлар борлигини, ушбу телефонларни икки кунлик муддатда почта хизмати орқали етказиб беришини айтади. Бошланғич тўловни 9860 0101 0701 6940 рақамли ва "Отабоева Камола" га тегишли бўлган 9860 1601 4132 1762 рақамли банк пластик карталарига ўтказиб олганидан сўнг икки кунлик муддатда телефонларини почта хизмати орқали етказиб бермасдан, буюртма берган мижозларни блоклаб ташлайди. 2024 йил 9 декабрь куни "Телеграм" мессенжери орқали +99893 568-85-96 абонент рақамига очилган "Олимжон" номли профил эгаси Абдиев Олимжон алоқага чиқиб, iPhone 13 Pro русумли телефон аппаратини сотиб олмоқчилигини айтади. Шу вақти унга мазкур телефонни олиши учун дастлаб телефоннинг 50 фоиз тўловини амалга оширишини, шундан сўнг қолган пулларни 12 ой давомида бўлиб тўлаши мумкинлигини, телефоннинг 50 фоиз тўловини амалга оширганидан сўнг телефонни икки кунлик муддатда почта орқали юборишини айтади. Шунда Абдиев Олимжон, тўловни қай тартибда амалга оширишни сўрайди. Унга "Отабоева Камола" га тегишли бўлган 9860 1601 4132 1762 рақамли банк пластик картани ташлаб беради. Абдиев Олимжон ташлаган пластик картага телефоннинг 50 фоиз тўловини, яъни 2.313.000 сўмни ташлаб беради. Шундан сўнг телефонни икки кунлик муддатда поч-та орқали юбормасдан Абдиев Олимжонни блоклаб, қора рўйхатга киритиб қўяди. Пулларни эса ўзининг эҳтиёжлари учун ишлатиб юборади. 
Ҳозирги кунда эса Саидкамолов Носир-бек ўз айбига иқрорлиги, қилган ишидан пушаймонлиги, жабрланувчига етказилган моддий зарарларни тўлиқ қоплаб берганлигини  инобатга олиб, қонуний енгиллик сўрамоқда.
Судланувчи Саидкамолов Носирбек, Ўзбекистон Республикаси ЖК 168-моддаси 3-қисмининг "б" бандида назарда тутилган жиноятни содир этганликда айбли деб топилиб, унга нисбатан базавий ҳисоблаш  миқдорининг 50 баравари миқдорида 18.750.000 сўм жарима жазоси тайинланди.