ОҚДАРЁ ТУМАН ХАЛҚ БАНКИНИНГ ЭГАСИ БОРМИ?

  Жорий йилнинг 5-6 январь кунлари пенсионерларнинг пластик карталарига пенсия нафақалари тушиши муносабати билан туман Халқ банки ҳар қачонгидан ҳам одамлар билан гавжум бўлди. Эрталабдан бошлаб узундан узун навбатда турган одамларнинг боши ҳам, охири ҳам кўринмайди. Одамлар ўртасидаги тирбандлик, тартибсизликни бартараф этиш учун масъул бўлган банк ходимлари эса бу ҳақда бош ҳам қотиришгани йўқ. Буни бизга бўлган тўхтовсиз мурожаатлардан ҳам билиб олиш мумкин: 
   - 5 январь куни Халқ банкига келиб, турмуш ўртоғимдан келган жўнатмани олиш учун кун бўйи сарсон бўлдим, - дейди  янгиқўрғонлик Шоҳиста. – Бир қарасанг линия банд, бир қарасанг свет йўқ дейишиб, 4-5 соат тик оёқда навбат кутдик. Банк ходимларининг мижозларга кўрсатаётган хизматидан жуда ранжидим. Кечки соат 4 ларда аранг пулни олиб, уйга қайтдим.
   - 6 январь куни эрталабдан Халқ банки ёнида пенсия карточкаларимизни нақд пулга алмаштириш учун навбатда турдик,- дейди ёши 70 дан ошган Хожи ота. Куннинг биринчи ярмигача юзлаб одамлар пластик карталарини нақд пулга алмаштириб олишди. Албатта орада жуда кўп тартибсизликлар, пулнинг узилишлари бўлди. Шу боисдан айни тушлик пайтида навбатим келиб пластик картамни нақд пулга алмаштирдим. Лекин негадир, пластик картамдан 1 фоизли пул ушлаб қолинди. Ахир, пенсионерларнинг пластик карталари фоизсиз алмаштирилади-ку?
    Отахоннинг мурожаати юзасидан 6 январь куни соат 13.10 да туман Халқ банкининг бошлиғи ҳузурига шошилдик. Минг афсуски, банк ходимлари учун айни тушлик пайти экан. Шундай бўлсада, халқимизнинг мурожаатига ечим топиш мақсадида банкнинг нураб қолган зиналарини қўрқа-қўрқа босиб, иккинчи қаватга кўтарилар эканмиз, биз у ердан на банк ходимларини, на банк бошлиғини учрата олмадик. Ҳеч бўлмаганда, кириш эшиги олдида бирор бир навбатчи ҳам қўйилмаганлигига баттар ҳайрон қолдик. Кимга мурожаат қилишни, халқимизнинг ҳақли эътирозларига сабаб бўлаётган ушбу муаммони қандай ҳал қилишни билолмай, масъуллардан бирига телефон қилишга мажбур бўлдик.
   Минг афсуски, ушбу телефондан сўнг, негадир Банкомат “бузилиб” қолди. 1 фоизли ушланмага ҳам рози бўлиб, пластик карталарини нақд пулга алмаштираётган отахону онахонлар навбати яна тўхтаб қолди. 
   Оқдарё туман халқ банкидаги бу тартибсизликни, ўз ишларига бўлган масъулиятсизликни ким назорат қилади? Банкни бошқараётган раҳбар борми? Агар бўлса нега бошлиқнинг ўрни умуман сезилмаяпти? Бу саволга тегишли масъуллардан жавоб кутамиз.