27- июнь - Матбуот ва оммавий ахборот воситалари ходимлари куни БАЙРАМ МУБОРАК, АЗИЗ ҲАМКАСБЛАР!

Газетада илк фаолиятимни бошлаганимга ҳам бу йил эллик йил бўлди. Шу давр мобайнида бу соҳанинг сир-асрорларини ўргатган азиз устозларимизнинг номларини ҳеч қачон унутмаймиз. Бутун умрини матбуотга бағишлаган маҳоратли муҳаррирлар Мамараҳим Мардиев, Қудратулло Мизомов, Ниёзхон Алиев, масъул котиб Рустам Аминов, қишлоқ хўжалигининг бўлим мудири Тоҳир Муҳаммадиев, маданият бўлимининг бўлим мудири Рашид Ашуров, қатор йиллар давомида газетада масъул котиб бўлиб ишлаган Тошназар Тўғизбоевларнинг номларини ҳурмат ва эҳтиром билан тилга оламиз. Биз улардан таҳрир ва таҳлил санъатини, танқидий мақолаларни ёзишни ўрганганмиз. Бу инсонларни ўзимизга устоз деб билганмиз.
Айни пайтда туманимиз кўзгуси ҳисобланган "Оқдарё овози" ўзининг 92 ёшини нишонламоқда. Бу даврда катта авлод билан бир қаторда ўрта авлод вакиллари ҳам газетанинг ўз вақтида мунтазам чиқиб туриши учун ўз қобилиятларини намойиш этишмоқда. Шуни алоҳида таъкидлаш керакки, қарийб 3000 нусхада чоп этилаётган газетамиз саҳифаларида туманда бўлаётган турли хил ўзгаришлар, шунингдек, жамиятимизга ёт бўлган нуқсонларни фош этишда танқидий чиқишлар ҳам мунтазам ёритиб борилмоқда. Бунда аҳил жамоамизнинг ҳар бир аъзоси ўз ҳиссасини қўшаётганлигини алоҳида эътироф этмоқчиман. 
27 июн мамлакатимизда матбуот ва оммавий ахборот воситалари ходимлари куни байрам қилинади. Фурсатдан фойдаланиб, барча журналистларни ва жамоатчи мухбирларни бу сана билан муборакбод этаман.