Mutaxassislar maslahati G'ALLA MAYDONLARINI ZARARKUNANDALARDAN HIMOYA QILISH USULLARI
Boshoqli don ekinlari maydonlarida sariq zang, qo'ng'ir zang, un shudring, sariq dog'lanish, septorioz, jami 10 dan ziyod kasalliklar zarar beradi. Eng xavflilaridan biri zang kasalliklaridir. Chunki zang juda tez (yong'in singari shiddat bilan) tarqalib, 3-4 haftada o'simlik bargla-rining aksariyatini quritadi va don hosiliga jiddiy zarar yetkazadi. Bir kecha-kunduzda zang sporalari (urug'lari) shamol tezligiga qarab 100-1000 km gacha masofaga tarqaladi. O'simliklarning sog'lom barglariga tushgan sporalar ularni zararlaydi, to'qima ichida rivojlanadi. Bir mavsumda zang 7-10 avlod berib, rivojlanadi.
Bugungi kunda O'zbekistonda bug'doyni zang kasalliklaridan himoya qilishning faqat bitta ishonchli usuli mavjud bo'lib, bu - fungisid purkashdir. Fungisid - o'simlik kasalliklariga qarshi qo'llaniladigan kimyoviy vosita. Zang kasalliklariga qarshi ob-havoning kelishiga qarab fevral oyining oxiri, mart oyida kasallik belgilari paydo bo'lishi bilan profilaktik ishlovlar amalga oshiriladi. Profilaktik ishlovdan keyin hududda "Infeksiya bosimi" kuchli bo'lsa yoki dalada zang bilan birga boshqa kasalliklar ham uchrasa, yog'ingarchilik ko'p bo'lib, nam havo saqlanib tursa, ob-havo bashoratini hisobga olgan holda 20-30 kun o'tgach, ikkinchi va yana lozim bo'lsa uchinchi marta ishlov berish talab etilishi mumkin. Ushbu tizim qo'llanilganda kasallikning oldi olinib, hosil asrab qolinadi. Zang va boshqa kasalliklarga qarshi ta'sir etuvchi preparatlar OVX va shtangali purkagich va motorli qo'l purkagichi bilan sepiladi.
O'zbekistonda begona o'tlarning 72 ta oilaga mansub bo'lgan 841 turi uchraydi. Shundan 519 turi bir yillik, 322 turi esa ko'p yillik o'simliklardir. Hosil miqdori va sifatini pasaytiradi. Begona o'tlar ko'pgina zararkunanda va kasalliklarning manbai hisoblanadi va ekinlarga soya solib, o'sishdan orqada qoldiradi. Tuproq haroratini 2-4C°ga pasaytirishi natijasida foydali mikroorganizmlar rivojlanishiga to'sqinlik qiladi. Tuproqdagi namlik (suvni 330-1900 marta) va mineral ozuqalarni madaniy o'simlikka nisbatan 10 marta ko'p iste'mol qiladi. Hosilni yig'ib-terib olishga to'sqinlik qiladi, o'rim yig'im texnikasi samaradorligini pasaytiradi. Qo'shimcha xarajatlar (haydov, gerbitsid, urug'larni tozalash, mineral o'g'it va boshqalar) rentabellik darajasini kamaytiradi. Hosilning sifatini 20-25 foizgacha pasaytiradi. Begona o'tlarning oldini olish maqsadida bug'doy 2-3 ta barg chiqargandan naychalash davrigacha, unib chiqqan begona o'tlarning bo'yi 10-15 sm bo'lgan davrda (taxminan fevral oyining oxiridan aprel oyigacha) kimyoviy ishlovlar o'tkaziladi, ya'ni gerbitsidlar belgilangan me'yorlarda qo'llanadi.
Respublikamiz g'allazorlarida 50 turdan ortiq zararkunanda hasharotlarning zarar yetkazishi kuzatilgan. Bulardan eng ko'p tarqalgani g'alla shiralari, bug'doy tripsi, zararli xasva, shilimshiq qurt, vizildoq qo'ng'iz, shved va gessen pashshalari va boshqa hasharotlar tarqalib, hosilga zarar yetkazishi mumkin. Bunday holatda - insektisid preparatlarni qo'llash zararkunandalarga qarshi kurashishning eng yaxshi usulidir.
Qadrli qishloq xo'jaligi mahsulotlari yetishtiruvchilari! Ekinlaringizga har qanday holatda kimyoviy ishlov berishdan oldin, albatta, O'simliklar karantini va himoyasi agentligi mutaxassislari bilan maslahatlashing. Preparatlarni qo'llashdagi birgina xatoyingiz sizning butun mavsum uchun qilingan rejalaringizni barbod qilishi, pirovardida hosilingizni butunlay yo'qotishingizga olib kelishi mumkin.
Shu o'rinda shuni eslatib o'tishimiz kerakki, tumanimizda ham zang kasalligiga qarshi proflaktik ishlov bermagan, begona o'tlarga qarshi gerbitsidlar sepmagan klaster va fermer xo'jaliklari mavjud. O'simliklar karantini to'g'risidagi qonunining 19-20-moddalariga asosan klaster va fermer xo'jaliklarining o'simlik kasalliklari, begona o'tlari, zararkunandalariga qarshi kurash majburiyati mavjuddir. Karantindagi kasalliklar, zararkunandalar, begona o'tlarga qarshi kurash ishlarini olib bormagan klaster va dehqon fermer xo'jaliklari MJTK ning 107-108-moddalari bilan ma'muriy javobgarlikka tortilishi to'g'risida ogohlantiramiz.
B. Ishniyozov,
B. Mamatmurodov,
A. Siddiqov,
tuman O'simliklar karantini va himoyasi bo'limi fitosanitar nazorati davlat inspektorlari.
Мавзуга оид:
AFRIKA TUYAQUSHI HAQIDA BILASIZMI?
- 18 дек, 15:15
AJAL OG"USI
- 10 окт, 14:14
Har bir murojaat ortida inson borligini unutmaylik
- 11 авг, 10:34
Har bir murojaat ortida inson borligini unutmaylik
- 11 авг, 10:34
BINOLARNING YONG’INGA CHIDAMLILIGI
- 21 июн, 13:21