БИР ОЛАМ ТААССУРОТ ОЛДИК

   Кечаги ўқиш куним мен учун жуда қизиқарли ўтди. Боиси талабалар учун катта аҳамиятга эга бўлган тадбир бўлганлигини алоҳида   таъкидлашни истардим. Университетимиз ректори Шерзод Қудратхўжаевнинг бевосита ташаббуслари билан Ўзбекистонимизда меҳмон бўлиб турган туркий биродарларимиз билан очиқ мулоқот ўтказилди.   Хушманзарали табиат қўйнида ўтказилган давра суҳбатида ҳар икки мамлакатларнинг шонли ўтмиши, бугуни ҳамда эртаси ҳақида муҳим фикрлар, қизиқарли фактлар  айтилди. Бундан ташқари, қардош халқларнинг буюк аждодларимиз ҳақида биз билмаган маълумотларни олдик.
   Шунингдек, давра суҳбати мобайнида ижодкор талабаларнинг шеърлари, қўшиқлари бу тадбирга янада файз берди. Бу жараённи юртимиз меҳмонлари ҳам ҳайрат билан кузатиб, иқтидорли талаба дўстларимизнинг фаоллигини албатта эътироф этишди. Мен ҳам мазкур тадбирдан илҳомланиб кетибман шекилли, шундоқ ўрнимдан туриб самарқандлик таниқли шоира, Ўзбекистонда хизмат кўрсатган маданият ходими Хосият Бобомуродова қаламига мансуб   "Ватан" шеъридан намуна ўқидим. 
  Умуман айтганда,  барча талабалар бу тадбирда катта қизиқиш билан иштирок этдик ва бундан олам-олам таассуротлар олдик. Энг муҳими эса ўзимизнинг тафаккур оламимизни янгидан-янги қизиқарли маълумотлар билан тўлдирдик. Ўйлайманки, шу каби тадбирлар кўп ташкил қилинса, биз талабаларга ҳар жиҳатдан фойдалироқ бўлади, деган фикрдаман.