Мактабда ёшлар етакчиси керак(ми)?

Яқинда мактабларда фаолият кўрсатаётган ёшлар етакчиларининг штати қисқартирилиб, маҳалла тизимига ўтказилди. Хўш, бу қанчалик тўғри? Ҳозирга қадар, аниқроғи собиқ шўро даврида ҳам мактабларда пионерлар вожатийси деган штатлар мавжуд эди. Улар бевосита ўқувчи-ёшлар билан мактабда ўтказилаётган барча тадбирларни тайёрлашарди. Ана шу пайтда ҳам фаол ўқувчилар сони кўпайиб турли хил тўгараклар фаолияти жонланиб қоларди. Кейинги пайтларда эса тан олишимиз керак, мактабларда ўқувчилар томонидан ўтказилаётган барча катта-кичик тадбирлар бевосита ёшлар етакчиси томонидан амалга ошириларди. Эндиликда эса маҳаллада фаолият юритаётган ёшлар етакчилари уюшмаган ёшлар ва мактаблардаги ўқувчилар билан ҳамкорликда иш юритишлари лозим. Хўш, бундай пайтда маҳалладаги ёшлар етакчисининг ҳудуддаги мактаб ўқувчилари билан ишлашга вақти бўладими? Бу саволга жавоб бериш албатта мушкул. Нима бўлганда ҳам мактаблардаги ёшлар етакчиси штатлари сақлаб қолинганда фойдали бўлармиди, деган фикрга келасан, киши.
Ўтган асрнинг бошларида яшаган буюк жадидларимиз - Маҳмудхўжа Беҳбудий, Абдулла Авлоний, Мунавварқори Абдурашидов, Ҳамза Ҳакимзода Ниёзий ва бошқа милллат фидойилари илм-фан ривожланишида халқ таълимининг ўрни беқиёс эканлигини ўзларининг асарларида алоҳида тилга олишган. Айниқса, миллат фарзандларини саводли қилишда муалллимларнинг ўрни беқиёс эканлигини кўп бор таъкидлашган. Уларнинг асарлари ёзилганига бир асрдан ошаётган бўлишига қарамасдан ҳозир ҳам аҳамиятини йўқотган эмас. Чунки ўқитувчи бу фарзандларимизга билим берувчи, ҳарф ўргатувчи оқ ва қорани фарқига боришни ўргатадиган инсондир.
Президентимиз томонидан ўқитувчиларнинг ойлик маошларини камида 1000 долларга етказиш ҳақида таклифлар бўляпти. Албатта шарафли ва машаққатли касб эгалари бўлган ўқитувчиларни қанча эъзозласак оз. Энг муҳими, ўқитувчини обрўсини ошириш билан биргаликда уларга уй-жой олишда ёки бўлмаса соғлигини тиклашда имтиёзлар яратилса, мақсадга мувофиқ бўларди. Чунки бугунги фан-техника тараққиёти ривожланиб бораётган бир пайтда ҳар ким ҳам ўқитувчилик касбини танлайвермайди. Буни унутишга асло ҳаққимиз йўқ.