Пресс-тур Ҳудудларда ташкил этилган янги тадбиркорлик субъектлари ва янги иш ўринлари


  Бугун “Оқдарё овози” газетаси томонидан ташкил қилинган навбатдаги Пресс-турда журналистлар туман Камбағалликни қисқартириш ва бандлик бўлими бошлиғи Дилфуза Мамадиёрова ҳамроҳлигида  “Бобур текстель” МЧЖ фаолияти билан яқиндан танишдилар.  Корхона фаолияти ва унда ишчилар учун яратилган шарт-шароитлар ҳақида корхона раҳбари Элёр Исаев маълумот берди:
  - “Бобур текстель” МЧЖ ўз фаолиятини 2021 йилда давлат томонидан ажратилган 1млд. 200 млн. сўмлик субсидия асосида бошлаган эди. Корхона очилиши муносабати билан қишлоқдаги 20 нафар ишсиз хотин-қизларнинг бандлиги таъминланди. Айни пайтда корхонамизнинг 1 ойлик товар айланмаси 150 млн.сўмни ташкил этмоқда. Яқинда Бобур маҳалласи ҳоким ёрдамчиси Дилшод Эргашевнинг ёрдами билан банк орқали 100 млн. сўмлик имтиёзли кредит олдик. Бундан мақсад корхонамизнинг иш самарадорлигини янада ошириш ва ишчи-хизматчиларимизга янги шарт-шароитлар яратишдан иборатдир.
  Корхонада фаолият кўрсатаётган хотин-қизлар билан суҳбат жараёнида маълум бўлишича, ишчи-хизматчиларнинг ойлик маоши ўртача 1,5-3 млн.га тўғри келмоқда. Ишчилар корхона томонидан бепул иссиқ овқат билан таъминланаётир. Улар тайёрлаётган эркаклар ва болалар кийимлари Ургут саноат зонаси орқали тўғридан-тўғри Ўзбекистон, Қирғизистон, Тожикистон ва бошқа давлатларга экспорт қилинмоқда.
   Пресс-тур иштирокчилари бўлган журналистлар тадбир давомида ўзларини қизиқтирган барча саволларига жавоб олишди.