МАТБУОТ АНЖУМАНИ

 Бугунги кунда дунё бўйлаб инсоният соғлигига хавф солаётган турли хил юқумли касалликларнинг олдини олиш, атроф-муҳит тозалиги, сув ва ҳаво софлигини сақлаш глобал муаммолардан бирига айланган. Шундай экан, инсоният томонидан она-табиатимизга нотўғри муносабатда бўлиш, атроф-муҳитни ифлослантиришга қарши кураш, турли хил юқумли касалликларнинг олдини олиш борасида бугунги кунда туман Санитария ва эпидемиология бўлими томонидан қандай ишлар амалга оширилмоқда? Соҳа мутахассислари иш жараёнида қандай муаммоларга дуч келишмоқда?
  14 март куни “Оқдарё овози” газетаси таҳририятида  Санэпид қўмита туман бўлими масъуллари билан “Инсон саломатлигига таъсир этувчи хавфли омилларни бошқариш тизимли мониторинггини олиб бориш ва таҳлил қилиш борасида амалга оширилаётган ишлар” мавзусида навбатдаги матбуот анжумани ўтказилди.
  Матбуот анжуманида Санэпид қўмита бўлими жамоатчилик билан ишлаш бўлими эпидемиология шифокори Бобур Аъзамов, “Паразитология” бўлими мудири Қундуз Қодировалар туманда олиб борилаётган ишлар ва муаммолар ҳақида батафсил маълумот беришди. Тадбир давомида соҳа вакиллари журналистлар томонидан берилган барча саволларга батафсил жавоб беришди.
Ўз мухбиримиз.