ҚИШДА ҚУЛУПНАЙ ПИШДИ

Томорқалардан унумли фойдаланаётган хонадонлар сони кундан-кунга ошиб бораётир. Айни пайт қиш фасли бўлишига қарамасдан, ҳар бир дақиқани ғанимат билган меҳнаткаш боғбонлар томонидан иссиқхоналарда худди очиқ ҳавода етиштириладиган барча экин турларидан қишда ҳам маҳсулот олиб, ўз оилаларига қўшимча даромад олиб келишаяпти. Бу борада З.М.Бобур маҳалласининг Муллақўрғон қишлоғида ҳам ибратга лойиқ ишлар олиб борилмоқда. Маҳалладаги аҳоли хонадонларида цитрус мевали дарахтлар билан бир қаторда помидор, бодринг ва зиравор экинларини етиштиради. Лекин ушбу қишлоқдаги бир оила қиш фаслида ҳам қулупнай экиб, ҳаттоки, даромад олишга ҳам улгурди.
- Бу йил имтиёзли кредит асосида 3 сотих жойда иссиқхона ташкил қилдик. "Мир" навли 36 туп лимон кўчатларини эрта баҳорда ўтқаздик. Лимон кўчатлари вояга етганга қадар ер увол бўлмасин деб, турмуш ўртоғим Ихтиёр Умаров билан биргаликда Каттақўрғон туманидан 800 дона қулупнай кўчатларини олиб келиб қададик, - дейди Меҳринисо Исаева. - Жорий йил 25 сентябрда экилган қулупнай кўчатларимиз ноябрь ойидан бошлаб ҳосилга кира бошлади. Айни пайтда   қулупнай мевалари пишиб етилаяпти. Бу йил аслида тажриба оширишни ўйлагандик, лекин меҳр билан парвариш этса, ҳар қандай экин ўз мевасини берар экан. Етиштираётган маҳсулотимиздан хурсандмиз. Албатта биринчи ўринда ўз оиламизга, ортганини эса ички бозорга олиб чиқиш ниятидамиз.
Шуни қувонч билан тилга олиш керакки, ҳозирга қадар маҳаллада қиш ойида ҳеч ким қулупнайдан мўл ҳосил олмаган эди. Муллақўрғонлик Меҳринисо опа эса маҳаллада биринчилардан бўлиб янгилик яратди. Одатда қулупнай мевалари баҳорнинг апрель-май ойларида етиштирилади. Демак, қишнинг чилласида ҳам бу экинни иссиқхоналарда экиб, ундан яхшигина даромад топса бўлар экан. Меҳринисо опанинг таъкидлашича, иссиқхонани табиий газ, кўмир ёки ўтин билан иситишга ҳожат йўқ. Фақатгина икки метр чуқурликда ҳамда икки қават қалин плёнка билан иссиқхона қопланса кифоя. Қулупнай кўчатларини томчилатиб суғориш технологиясидан фойдаланиш лозим экан.
Бу етиштирилган маҳсулот янги йил дастурхонимиз ҳамда бозорларимиз расталарини безайди.