МАКТАБ ЎҚУВЧИЛАРИНИНГ ТЎЙХОНАДА ХИЗМАТ ҚИЛИШЛАРИГА РУХСАТ БОРМИ?

Яқинда бир тўйхонага бордим. Туманда энг зўр базмгоҳлардан бири бўлган бу кошонада тўй авжида. Санъаткорлар томонидан дилни қитиқловчи куй ва қўшиқлар янграб турибди. Қарийб минг кишилик даврага энг ачинарлиси 12-14 ёшлардаги мактаб ўқувчилари хизмат қилишаяпти. Ичкиликбозлик авжида бўлганлиги учун хизмат қилувчи бу болаларнинг қўли қўлига тегмайди. Биров чой олиб кел деса, бошқаси ароқ қолмаганлигини айтиб тезроқ олиб кел деб буйруқ беради. Хуллас, хизматчиларнинг ташвиши бошидан ошиб ётибди. Ҳатто кўп ичиб маст бўлиб қолган меҳмонлардан бири хизмат қилаётган ёш болани ҳақоратлаб сўкди. Бола эса жим. Нима ҳам десин? Гап қайтарай деса отаси тенги одам. Гап қайтарган тақдирда ҳам тўйхона эгаси ҳеч иккиланмасдан ишдан ҳайдаб юбориши мумкин. Ўша куни очиғини айтганда тўйдан асабий ҳолда қайтдим. Чунки меҳмон ва мезбонларнинг ёш болаларга нисбатан қилган муомаласи, ҳақоратлари кайфиятимни бузди.
Мактаб ёшидаги вояга етмаган болаларнинг тўйхоналарда хизмат қилиши мумкинми? Айнан шу савол билан ҳуқуқшунос Шавкат Қурбоновга мурожаат қилдик. Саволимизга у шундай жавоб берди:
- Вояга етмаган болаларни мажбурий меҳнатга жалб қилиш қонунларимизда ман этилган. Ўзбекистон Республикасининг "Маъмурий жавобгарлик тўғрисида"ги  Кодекснинг 49-моддасида мансабдор шахс томонидан меҳнат ва меҳнатни муҳофаза қилиш тўғрисидаги қонун ҳужжатларининг бузилиши - энг кам иш ҳақининг икки бароваридан беш баробаригача жарима солишга сабаб бўлади. Худди шундай ҳуқуқ-бузарлик вояга етмаган шахсга нисбатан содир этилган бўлса - энг кам ойлик иш ҳақининг беш баробаридан ўн баробаригача жарима солишга сабаб бўлади, дейилган.
Демак, қонун ҳужжатларимизда мактаб ўқувчиларининг тўйхоналарда хизмат қилишлари мумкин эмаслиги алоҳида таъкидланган. Нега унда, тўйхоналаримизда қонунларга амал қилинмаяпти? Нега, айбдор шахсларга нисбатан тегишли жазо қўлланилмаяпти? Буни мутасадди ташкилотлар ўрганишлари ва айбдорларга нисбатан тегишли қонуний чора кўришлари лозим эмасми?

Й.МУҲАММАДИЕВ.