ПЕДАГОГЛАР ПЕШҚАДАМЛАР САФИДА

Ўтган 2020 йилда бошланган коронавирус пандемияси туфайли бутун дунё бўйича кўплаб аҳоли ушбу касалликка чалиниб соғайгани ҳақида норасмий тахминлар айтилаётган эди. Йил охирига бориб касалланиш ҳолатлари кескин камайиб кетгандек туюлди. Минг афсуски, орадан ярим йил ўтиб, «COVID-19»нинг янги тўлқини юзага келди.     
Дунё олимларининг сўзларига кўра, айни пайтга келиб коронавирусга чалиниб соғайган одамларда ҳам бу вирусга нисбатан шаклланадиган иммунитет кучли эмаслиги сезилмоқда. Мана шу вазиятда эса одамларнинг саломатлигини сақлаб қолиш борасида бирдан бир нажот вакцина эканлигини ҳаётнинг ўзи кўрсатиб турибди. Негаки, олимларнинг фикрига кўра вакцина коронавируснинг битта оқсилига нисбатан организмда иммунитет чақиради. Бу иммунитет вирусга чалиниб соғайгандан кейин пайдо бўладиган иммунитетдан кўра яхшироқдир.
Умуман, ҳозирда бутун дунёда аҳоли 5-6 хил вакцина билан эмланяпти, бу вакциналарда илмий жиҳатдан муаммолар йўқ. Лекин ҳозир интернетда ниҳоятда кўп ёлғон маълумотлар тарқаляпти. Вакциналардан келадиган иммунитет қанча вақт сақланиб қолади, буни аниқлашга ҳали эрта. Чунки бунинг учун вақт керак. Муҳими ва асосийси, вакцинация натижасида шаклланган иммунитет коронавирусга чалингандан кейин юзага келадиган иммунитетдан кучлироқ бўлади.
Олий Мажлис Сенатининг ўн еттинчи ялпи мажлисида "Ўзбекистон Республикасининг айрим қонун ҳужжатларига аҳолининг санитария-эпидемиологик осойишталигини таъминлашга қаратилган ўзгартишлар ва қўшимча киритиш тўғрисида"ги қонун ҳам муҳокама қилинди. Жамоатчилик томонидан энг кўп муҳокама этилган қонун давлат раҳбари томонидан имзоланди ва қонуний кучга кирди. Шунга кўра Бош давлат санитария врачининг қарори билан 14 та соҳада меҳнат фаолиятини юритувчи шахсларнинг мажбурий эмланиши кўзда тутилган.
Мамлакатимизда биринчилардан бўлиб ҳалқ таълими ходимларининг, улар орқали келажагимиз ворислари бўлган ёш авлод ҳаётини, соғлигини муҳофаза қилишга катта эътибор берилди. Мактабимизда фаолият кўрсатаётган барча педагог ходимлар, ишчи ва хизматчилар ўқув йилининг сўнгги чорагидан бошлаб оммавий равишда ўз хоҳишлари билан коронавирус касаллигига  қарши 3 босқичда эмландилар. Бу албатта, мактабимизда соғлом муҳитни барқарорлаштириш, янги ўқув йилидан янги куч-ғайрат билан фаолиятимизни бошлашимизда муҳим аҳамиятга эга эканлигини алоҳида таъкидлаш лозим. 
Янги 2021-2022 ўқув йили яқинлашгани сари ота-оналардан унинг қандай шаклда бўлиши борасида кўплаб саволлар келиб тушмоқда. Барчамизга маълумки, бутунги кунда бутун дунёдаги каби юртимизда ҳам коронавирусга чалиниш ҳолатлари давом этмоқда. Энг ачинарлиси, ўтган йилдагига нисбатан мактаб ёшидаги болалар орасида ҳам касаллик тарқалиши ҳолатлари кузатилмоқда. Шу боис Халқ таълими вазирлиги янги 2021-2022 ўқув йилида мактабларда дарс жараёни гибрид шаклда давом эттирилишига тайёргарлик кўраётганини маълум қилди. Бунда мактабда юзага келадиган вазиятга қараб мактаб Санитария-эпидемиология назорати Марказлари таклифига асосан маҳаллий кенгашлар қарорларига кўра айрим мактаблар карантинга ёпилиб, масофавий тизимга ўтказилиши ҳам мумкинлиги қайд этилган. 
Шу боисдан ҳам Халқ таълими вазирлиги анъанавий таълимни тўлиқ тикланиши учун барча тизим ходимларини тезроқ вакцина олишларини тавсия этмоқда. Негаки, ҳар қандай энг замонавий масофавий таълим тизими ҳам бевосита мактабдаги таълим ўрнини боса олмайди.
Aйни вақтда мамлакатимиз бўйлаб аҳолини коронавирус инфекциясига қарши эмлаш ишлари давом этмоқда. Ушбу жараён туманимизда ҳам жадаллик билан олиб борилмоқда. Жойларда аҳоли саломатлигини мустаҳкамлаш йўлида тегишли масъул ташкилотлар томонидан тарғибот ишлари кучайтирилмоқда. 
Ҳурматли фуқаролар, ўзингиз ва яқинларингиз саломатлигини асранг! Вакцина олинг!