Оқдарёлик футболчилар устози

Уни туманимизда танимаган, билмаган футбол ишқибозлари камдан-кам топилади. Ёшлигидан бошлаб футболга меҳр қўйиб шу орқали элда обрў-эътибор топган бу инсонни сиз ҳам яхши танийсиз. Бу Холдор қишлоғида туғилиб ўсган, кўп йиллардан буён Оқдарё футболини чўққига кўтариш учун астойдил ҳаракат қилаётган мураббий Собир Довуровдир. Ўрта мактабни битиргач у Самарқанд шаҳридаги жисмоний тарбия техникумида ўқиди. Ёшлигидан футболда чиниққанлиги учун техникум терма жамоасида кўп бор ўзини кўрсатди. Техникумни битиргач ўзининг иш фаолиятини дастлаб 18-мактабда бошлади. Кейин бир неча йил давомида 45-умумтаълим мактабида ёшларга жисмоний тарбия сирларини эринмасдан, қунт билан ўргатди. Қарийб қирқ беш йил давомида ўзи туғилиб ўсган қишлоқдаги 46-умумтаълим мактабида спорт сирларини ўқувчиларга қунт билан ўргатди. Айни пайтда нафақада бўлишига қарамасдан, спорт мактабида футбол бўйича мураббий сифатида фаолият кўрсатмоқда. Очиғини айтиш керакки, ҳозирга қадар спорт мактабида футбол тўгараги мавжуд эмас эди. "Оқдарё овози" газетасида бу ҳақда бир неча бор танқидий мақола эълон қилингандан сўнг масъуллар танқиддан тўғри хулоса чиқаришиб футбол тўгарагини ташкил этишди. Бу тўгаракка малакали мутахассис Собир Довуров раҳбарлик қилмоқда. Машғулотларни бошланганлигига унча кўп вақт бўлмаган бўлсада, ўзига яраша бир неча гуруҳ ташкил этди. Ҳозирда туман марказида ва 46-мактабда ташкил этилган гуруҳларда футбол мусобақалари, машғулотлари мунтазам равишда ўтказиб борилмоқда.
- Яқинда "Туман ҳокими кубоги" учун 46-47-36-18-29 умутаълим мактабларида ўқиётган 2009-2012 йилларда туғилган ўқувчилар ўртасида футбол мусобақасини ташкил этдик,- дейди мураббий Собир Довуров. - Ўтказилган мусобақа ғоят кескин курашлар остида бўлганлигини алоҳида таъкидлашим керак. Ёш футболчиларимиз ғолиблик учун астойдил кураш олиб боришди. Финал мусобақаси ҳам қизиқарли бўлганлигини мухлислар ҳам алоҳида тилга олишди. Барча рақибларини мағлубиятга учратган 46-умумтаълим мактабининг ёш футболчилари мусобақа ғолиби бўлишди. 
Оқдарёдан етишиб чиққан кўплаб иқтидорли футболчилар Собир Довуровни ўзининг устози деб билишади. Кўп йиллар Қаршининг "Наcаф" ва Самарқанднинг "Динамо" жамоаларида тўп сурган айни пайтда эса "Динамо" жамоасида раҳбарлик вазифаларидан бирини бажараётган Учқун Қобилов шундай дейди:
- Мактабда ҳам бизга спорт сирларини айниқса, футболни мукаммал ўргатганлиги учун футболчилик касбини танладим. Эришган барча ютуқларимда у кишининг муносиб ҳиссаси бор деб биламан. Биринчи устозим ҳам Собир Довуров эканлигини ҳар доимо фахр билан таъкидлайман. Нафақада бўлишига қарамасдан биз билан доимо алоқада. Турли футбол мусобақаларни ўтказишда ҳам доимо бош-қош бўлмоқда. Бир сўз билан айтганда, у кишини фахр билан оқ-дарёлик футболчиларнинг устози, десак арзийди.
Дарвоқе, Собир Довуров ўтган асрнинг тўқсонинчи йилларида ташкил этилган "Оқдарё" номи билан аталувчи футбол жамоасида кўп йиллар тўп тепиб мухлисларнинг ҳурмат-эътиборига сазовар бўлганлигини ўрта ёшдагилар бизга доимо эслатишади. Биз етмиш ёшга яқинлашиб бораётган бўлсада, ҳамон ёшларга хос ғайрат-шижоат билан меҳнат қилаётган тажрибали мураббийнинг келгусидаги барча ишларига омад тилаймиз.
Суннатулло ИБРАГИМОВ.
Суратда: мураббий Собир Довуров  футбол мухлислари билан 
суҳбатлашаётган пайт акс 
эттирилган.